ازاى اكون مشرف

بسم الله الرحمن الرحيم

احب اوضح ايه هى مهام المشرف و ايه الفرق بينه وبين العضو النشيط اللى شغال يعنى

نبدا باذن الله
اولا احب اقول ان الفرق بسيط جدا بين انك تكون مشرف وعضو نشيط لكن لو كنت عضو عادى مبتشاركش الا قليل جدا هنا يكون فيه فرق لانك لو كنت عضو نشيط فان كل الاعضاء تنتظر مواضيعك بفارغ الصبر لكن اذا كنت عضو عادى محدش هيستنى مواضيعك لانك مش شغال معاهم

وهى دى المعادله الصعبه اللى اى منتدى بيحاول يحققها

طبعا هتقولولى انت عمال تقول كلام ملوش لازمه من الصبح خلصنا وقولنا ازاى اكون مشرف ..........

شفت بقى طول ما انت عمال تسال كدا مش هتبقى مشرف طول عمرك

هنقول مثلا انت عاوز تبقى مشرف فى قسم معين زى منتدى اللعبه الحلوه مثلا لازم تركز كتباتك فيه لكن متهملش باقى الاقسام بس اكتر مشاركاتك تكون فيه

وتحاول تعمل فيه شغل جامد وتجيب افكار جديد للقسم دا

يبقى دلوقتى الهدف من انى احكيلكوا القصه ديه ايه ؟

واحد دلوقتى يقولى الهدف يعنى انى مفكرش ابقى مشرف علشان ابقى مشرف ؟

اقوله لا يا حلو انت شاكلك كنت بتاكل بطاطا وانت بتقرى الموضوع

الهدف يا جماعه من القصه دى كلها انى اوضح ان مفيش فرق بين المشرف و العضو النشيط بالعكس بقى

ان العضو النشيط بيكون احسن من المشرف لانك ممكن تكون مشرف وممكن اوى فى اى وقت تتشال وساعتها هايبقى المنظر مش قد كده

انما لما تبقى عضو قوى وليك كلمه وليك راى

الاداره هيا اللى هتطلبك

واحد يسال ويقولى يعنى انت جايبنا دلوقتى علشان تقولنا الكلام دا انت مش هتقولنا ازاى تبقى مشرف بقى ولا ايه؟؟؟؟؟

ارد عليه واقوله انى مش جاى اقوله ازاى تبقى مشرف صدمه حلوه مش كدااا ازاى اكون مشرف Biggrin

بس انا جاى هنا اقولك ازاى تبقى احسن من المشرف

المشرف بيزيد عن العضو النشيط فى الاتى :

1- بيبقى معاه اوبشن زياده فى قسم معين يعنى يلغى موضوع معين يعدل موضوع معين ينقل المواضيع كده يعنى

2- يا ويله بقى لو لغى موضوع بالغلط او اتصرف مع عضو معين بطريقه غلط

3- هو المسؤل الاول فى حالة فشل القسم حتى لو الفشل ده جاى من الاعضاء

ومسؤليات وحاجات كتير مش مجالها هنا اننا نتكلم عليها

واحد دلوقتى يقولى طب يا عم سمارت انت كرهتنى ابقى مشرف اساسا قلنا بقى ازاى نبقى اعضاء لينا كلمه او نكون حاجه كده زى اللى بتتكلم عنها ؟

ارد عليه اقوله انت كده حبيبى وكفاءه وميه وميه

بص يا سيدى

علشان تبقى مميز ( لو انت عاوز تبقى مميز )

اول حاجه لازم تتعامل بطبيعتك فى المنتديات يعنى ابعد عن التصنع او انك تظهر بشخصيه غير شخصيتك خليك عادى جدا اكنك فى تجمع عادى او مقابله مع احد الاصدقاء

ثانيا : امسك المنتدى قسم قسم وشوف انهى قسم معين انت تقدر تبدع فيه

واحد يقولى مش لاقى قسم ابدع فيه انا كل علاقتى بالكمبيوتر العاب وافلام واغانى ومهووس بيها

اقله ده فى حد ذاته مش هدف بس هوايه او وسيله والحياه كلها مش اغانى والعاب وبس والا مكنتيش المنتديات فتحت او لقت صدى عند الناس

واحد يجى يقولى ( فى لحظة صدق نادره مع نفسه ) انا دايما بحب انقل المواضيع من منتديات اخرى واحطها هنا

ارد عليه واقله ان انت ممكن تبدع فى نقل المواضيع

ازاى ؟

هو الموضوع اللى بتنقله ده مش ليه فكره

خد انت الفكره ديه وصيغها او اكتبها بطريقتك انت واحب على النت فى جميع المواضيع المشابهه لهذا الفكره وكون موضوع زى ما بيقوله مكس حته من هنا على جمله من هنا بس اوعى تنسى نفسك وتحط حاجه من عندك انت فى الموضوع ده

ثالث حاجه حاول دايما تقترح الجديد حاول يكون مخك شغال دايما

واحد طبعا دلوقتى ...

سورى سورى المره ديه واحده تيجى تقولى مش فاهمه حاجه يعنى ايه اقتراح جديد

يعنى مثلا انا شايف ان معظم المتقدمين متقدمين لقسم زى قسم القلب المفتوح

تفتكروا نقدر نبدع فى القسم ده ازاى او ايه الجديد اللى ممكن نقدمه غير اننا نحط حاجات الخاصه بالقلب دى زى المشاكل العاطفيه وخلافه ؟

مثلا مثلا واحد يفكر اننا نعمل مسابقه معينه

واحد تانى يعمل موضوع جديد عن عيد الام باعتباره برده مرتبط بالحب

الافكار كتير والموضوع انا لو سبت نفسى هاحتاج 100 موضوع مش موضوع واحد

انا بس والله مش راضى اطول عليكوا اكتر من كده

واحد دلوقتى هايقولى كل ده وما طولتش ؟

ارد واقله ردك ده فى حد ذاته ابداع

اه نسيت اقولكم
لو واحد جه وسالنى مثلا الاسئله دى

ماهى صفات المشرف التى تتمنى تواجدها فى تصرفاته وشخصه؟

الصبر و قليل من الحكمه

سلبيات فى الاشراف تتمنى زوالها؟

انى اكون مشرف لقسم معين وسايب القسم بتاعى بايظ وعمال اشارك فى اقسام تانيه

هل تعتقد ان للاشراف عيوب ؟

مفيش حاجه مفيهاش عيوب

بس العيب فى الاشراف يكمن فى ان واحد مش قد الاشراف يبقى مشرف

اصل متفتكريش ان المشرفين ولا حتى المديرين ملهمش عيوب

بس الفكره ان مجمل المشرف ده كويس ولا مجمله وحش

هل تعتقد أن العضو أكثر حرية من المشرف؟

معادله صعبه

لو من ناحية الاداء فى المواضيع الاتنين واحد

لو من ناحية الواجبات العضو اكثر حريه

لو من ناحيه التحكم المشرف اكثر حريه

يعنى من الاخر العضو ليه مساحه حريه اكتررر بكتير من المشرف

ارجو ان اكون وضحت لكم شيئا على الاشراف
تحياتى
طاهــ علام ـــر

كلم جامد اوي ياطاهر
ومسؤوليه كبييره
ربنا يعين لجميع
وتمنى النجاح للمنتدى
وشكررررررررررررررا

يا طاهوره

والله ما فاهم اى حاجه